Landssamband íslenskra Kvennakóra

Aðventutónleikar Kvennakórs Garðabæjar verða haldnir þriðjudaginn 6. desember kl. 20 í Digraneskirkju.

Boðið verður upp á einkar fjölbreytta efnisskrá með sígildum jólaperlum, hátíðlegum og léttum.

Með kórnum spilar kontrabassaleikarinn Þorgrímur Jónsson. Stjórnandi tónleikanna er kórstjórinn og sópransöngkonan Ingibjörg Guðjónsdóttir og píanóleikarinn er Sólveig Anna Jónsdóttir.

Forsala aðgöngumiða er hafin hjá kórkonum og á netfangi kórsins kvennakorgb@gmail.com

Forsöluverð 2500 kr.
Miðaverð við innganginn á tónleikadag 3000 kr.

Samkvæmt hefð verður boðið upp á heitt súkkulaði og jólasmákökur að tónleikum loknum.

Kvennakór Kópavogs fer inn í söngárið með gleði og eftirvæntingu fyrir spennandi verkefnum vetrarins. Stjórnandi kórsins er hinn frábæri John Gear sem hefur gríðarlegan metnað og lag á að ná því besta út úr kórnum í hinum ýmsu verkefnum. Kórinn sem telur um 50 söngelskar konur, flestar úr Kópavogi hefur verið starfandi í næstum 15 ár. Mikil gróska hefur verið í kórnum undanfarin ár og margar nýjar konur bæst í hópinn. Einnig komu inn í haust „gamlar“ kórsystur og því var kórinn fullmannaður fyrir þetta söngár. Vegna þessa hélt kórinn enga opna æfingu fyrir nýjar konur eins og áður hefur verið á haustin. Auk vikulegra æfinga frá september hafa verið haldnir tveir langir laugardagar þar sem æft hefur verið af krafti. Sú nýjung var í ár að kórinn tók hluta af öðrum laugardeginum í stefnumótun þar sem farið var í vinnuhópa og framtíðarsýn kórsins var mótuð. Í þessari stefnumótun kom fram að kórkonur voru almennt ánægðar með breiddina á lagavali kórstjórans sem spannar allt frá hinu ljúfa lagi Vetrarnótt til Fat Bottomed Girls með Queen.  Einnig mun kórinn vilja geta tekið að sér söng við ýmis tilefni og eiga til þess góðan lagabanka.  Fyrsta uppskera vetrarins verða einmitt jólatónleikar þar sem kórinn fær með sér góða gesti og má vænta þess að ljúfir og hátíðlegir tónar komi tónleikagestum í góða jólastemningu.  Tónleikarnir verða í Fella- og Hólakirkju þann 10. desember kl. 17:30 Miðaverð er 1.500 kr., en frítt er fyrir 12 ára og yngri Miðasala er hjá kórkonum og við innganginn.

Kvennakór Reykjavíkur heldur tvenna aðventutónleika í Háteigskirkju, fyrsta sunnudag í aðventu, þann 27.nóvember.
Fyrri tónleikarnir hefjast kl. 17 og þeir seinni kl. 20. 

Á efnisskrá eru lög sem tónleikagestir þekkja og munu án efa koma öllum í hátíðarskap. 
Þar má nefna hinn gullfallega sálm Kolbeins Tumasonar frá 13. öld, Heyr himnasmiður, við lag Þorkels Sigurbjörnssonar, Jólaköttur Jóhannesar út Kötlum við lag Ingibjargar Þorbergs í útsetningu Vilbergs Viggósonar sem einnig útsetti fyrir kórinn lag eftir Eyvör, Dansaðu vindur. Þá má einnig nefna gamlan vin, Gloríu eftir Vivaldi, Gaudeamus Hodie, Bæn Arons og fleiri perlur sem fylla efnisskrána. 

Í kjölfar hvorra tónleika um sig, býður Kvennakór Reykjavíkur gestum að staldra við í safnaðarheimili Háteigskirkju og þiggja léttar og jólalegar veitingar, spjalla og njóta samveru.

Stjórnandi er Ágota Joó, um undirleik sjá þeir Vilberg Viggósson á píanó, Hávarður Tryggvason á kontrabassa, Sigurgeir Agnarsson á Selló og Zbigniew Dubik á fiðlu. 

Miðaverð er 3.000 kr í forsölu og 3.500 kr við innganginn og fást miðar hjá kórkonum, í síma 8966468 eða í gegn um netfangið postur@kvennakorinn.is

Hlökkum til að sjá ykkur.

Kvennakór Hafnarfjarðar heldur tónleika í Hásölum við Strandgötu miðvikudaginn 16. nóvember kl. 20:00. Tónleikarnir verða helgaðir íslenskri tungu og fær kórinn til sín góða gesti sem eru kórkonum ekki með öllu ókunnir. Þetta eru kórfélagar úr Karlakór Hreppamanna sem tóku svo einstaklega vel á móti kvennakórskonum síðast liðið vor þegar kórarnir tveir sungu saman á Flúðum og á Selfossi.

 

Kórkonur munu ekki syngja hefðbundna jólatónleika í ár og bregða þar með út af margra ára hefð. Þess í stað halda þær núna al íslenska tónleika sem bera yfirskriftina Móðurmálið mitt og verða flutt ljóð og lög eftir mörg dáðustu ljóðskáld þjóðarinnar. Má þar fyrst nefna Jónas Hallgrímsson, sem dagur íslenskrar tungu er kenndur við, Hallgrím Pétursson, Tómas Guðmundsson, Megas og fleiri meistara íslenskrar ljóðagerðar. Sem dæmi um lagahöfunda má nefna Sigvalda Kaldalóns, Sigfús Halldórsson, Inga T. Lárusson  og Oddgeir Kristjánsson. Það er kórkonum kærkomið tækifæri að fá að rifja upp og flytja öll þessi fallegu íslensku sönglög sem hafa lifað og dafnað með þjóðinni um langan aldur.

 

Stjórnandi Kvennakórs Hafnarfjarðar er Erna Guðmundsdóttir og píanóleikari er Antonía Hevesi. Stjórnandi Karlakórs Hreppamanna er Edit Molnár og píanóleikari er Miklós Dalmay.

 

Miðasala á tónleikana fer fram hjá kórkonum og við innganginn og er miðaverð 2.500 kr. Einnig má senda tölvupóst á kvennakor.hafnarfjardar@gmail.com eða skilaboð á Facebook síðu kórsins. Frítt er fyrir börn 12 ára og yngri. Tónleikagestum verður boðið að þiggja kaffi og konfekt í tónleikahléi.