Landssamband íslenskra Kvennakóra

Landsmót kvennakóra fer fram á Ísafirði dagana 11.-14. maí 2017. Gert er ráð fyrir að mótið hefjist seinni partinn fimmtudaginn 11.maí, með móttökuathöfn og setningu í Íþróttahúsinu á Torfnesi. Engin dagskrá verður sunnudaginn 14.maí þannig að konur geta hvílt sig eftir tónleika og sameiginlegt hátíðarkvöld og nýtt daginn til heimferðar. Búið er að stofna síðu á facebook fyrir mótið: https://www.facebook.com/landsmot2017/?fref=ts Þar verða allar helstu upplýsingar settar inn en einnig er hægt að senda fyrirspurnir á netfangið landsmot2017@gmail.com

Smiðjur hafa verið ákveðnar og þemu í þeim. Allir smiðjustjórar eru búnir að staðfesta þátttöku. Til að byrja með er áætlað að bjóða upp á 5 smiðjur, en hægt verður að bæta einni við, fari þátttaka fram úr björtustu vonum

Smiðjur

BG-smiðja - Margrét Geirsdóttir ásamt Baldri Geirmundssyni

Með ungverskum áhrifum - Beata Joo

Í latino sveiflu - Ingvar Alfreðsson

Skapandi útsetningar og spuni - Hildigunnur Einarsdóttir og Lilja Dögg Gunnarsdóttir

Þvert á stíl - Helga Margrét Marzellíusardóttir

Upplýsingar um lög í smiðjum verða sendar út til kóranna um leið og þau berast og kórarnir þá beðnir um að velja smiðju.

Landsmótslag

Valið var ljóð eftir alþýðuskáld af Hornströndum. Hið unga ísfirska tónskáld Halldór Smárason fékk það hlutverk að semja lag og Halldór afhenti kórnum lagið nú í vikunni.

Sameiginleg lög

Blackbird – Lennon og McCartney

Sway – Demetrio og Beltrán Ruiz

Þannig týnist tíminn – Bjartmar Guðlaugsson

Landsmótslagið – Halldór Smárason

Val á útsetningum er í höndum Bjarneyjar Ingibjargar Gunnlaugsdóttur, kórstjóra Kvennakórs Ísafjarðar.

Skráning

Í janúar sl. sendi mótsnefndin aðildarkórum bréf þar sem boðið var upp á forskráningu. Kórar voru jafnframt beðnir um að staðfesta skráningu fyrir 1.október 2016. Nú hefur verið ákveðið að fresta þessari staðfestingu til 1. nóvember en jafnframt beðið um að greitt verði staðfestingargjald, 8500 krónur á mann. Staðfestingargjaldið er óendurkræft.

Þátttaka virðist ætla að vera góð og þegar þetta er skrifað eru 8 kórar og þar með um 280 konur búnar að skrá sig. Aðildarkórar Gígjunnar eru eðlilega í forgang en ef pláss leyfir verður öðrum kvennakórum sem og stökum kvenkyns félögum í kórum sem hafa áhuga, boðin þátttaka.

Bréfinu fylgdi skjal með upplýsingum um gististaði á Ísafirði og nágrenni og sem sent var kórum í til að auðvelda þeim að finna sér gististað og átta sig á því hvað er í boði. Hver kór sér þó alfarið sjálfur um að bóka gistingu. Nú þegar hefur talsvert verið bókað af gistirými á Ísafirði en næga gistingu er enn að fá í nágrannabyggðarlögum og er aðeins milli 10 og 15 mínútna akstur þangað sem styst er að fara.

Mótsgjaldið

Áætlað er að mótsgjaldið fari ekki yfir 40.000 kr. á þátttakanda. Innifalið í mótsgjaldinu eru:

• Þátttaka í smiðjum föstudag og laugardag, ásamt léttum kaffiveitingum

• Sameiginlegar æfingar og tónleikar

• Óvissuferð (veitingar)

• Hádegisverðir föstudag og laugardag

• Kvöldverður föstudag og létt snarl

• Hátíðarkvöldverður og dansleikur laugardag

• Undirbúningur og vinna (stjórnendur í smiðjum, æfingum og á tónleikum; tónsmíðar vegna landsmótslags, kórstjórn og hljóðfæraleikur á æfingum og tónleikum o.fl.).

Drög að dagskrá

Fimmtudagur 11.maí  

Kl. 16-18 – Mótsgögn afhent, léttar veitingar

Kl. 18 – Sameiginleg æfing á sviði í íþróttahúsi á Torfnesi

Kl. 19 – Kvöldverður, óvissuferð, bryggjuball

Föstudagur 12.maí

Kl. 9:30-11.45 Smiðjur. Á sama tíma málþing fyrir kórstjóra (Þetta er í höndum kórstjóra og ekki innifalið í skráningargjaldi kórkvenna).

Kl. 12.-13 – Hádegisverður /Fundur Gígjunnar

Kl. 13.-14.30 – Frjáls tími

Kl. 14.30-15.30 – Sameiginleg æfing á sviði í íþróttahúsi á Torfnesi

Kl. 16-17 – Frjáls tími

Kl. 17.30 – Léttur kvöldverður og undirbúningur kóranna fyrir tónleika um kvöldið

Kl. 19 – Tónleikar kóranna í íþróttahúsi. Að þeim loknum létt snarl, tónlist og samvera

Laugardagur 13.maí

Kl. 9:30-11.45 – Smiðjur.  

Kl. 12-13 – Hádegisverður

Kl. 13.30 – Sameiginleg æfing og undirbúningur fyrir sameiginlega tónleika með afrakstri úr smiðjum og með sameiginlegum kór

Kl. 16-18 – Sameiginlegir tónleikar kóranna

Kl. 19.30 Hátíðarkvöldverður, dansleikur og mótsslit

Sunnudagur 14.maí

Hvíld og heimferðardagur

Íþróttahúsið á Torfnesi, Ísafirði verður “aðal staðurinn” og þar verður:

• móttaka og skráning

• hádegisverðir (2x)

• kvöldverðir (2x)

• sameiginlegar æfingar

• tónleikar kóranna

• hátíðartónleikar

• 1 af smiðjunum

• (hugsanlega einhver atriði til viðbótar)

Aðrar smiðjur fara fram víðs vegar um bæinn, allt er í göngufæri en ef konur eiga erfitt með gang þurfa kórar að gera ráð fyrir að geta útvegað akstur til að komast á milli.

Landsmótsnefndin fundaði nýlega með kórfélögum og var rætt um vinnuna sem framundan er. Búið er að stofna nefndir til að halda utan um hin ýmsu verkefni sem þarf að vinna. Þá mun Kvennakórinn Norðurljós á Hólmavík mun aðstoða Kvennakór Ísafjarðar við framkvæmd mótsdagana.

Með söngkveðju frá landsmótsnefnd,

Hildur Halldórsdóttir               hildur@misa.is                       s. 8990538

Pernilla Rein                           pernillarein@gmail.com         s. 8207579

Þuríður K. Vilmundardóttir     turidurkatrin@hotmail.com   s. 8944211

Kvennakór Garðabæjar heldur til Svíþjóðar í lok september til þátttöku í sænsku kvennakóramóti

Þessa dagana er Kvennakór Garðabæjar að undirbúa sig fyrir þátttöku í kvennakóramóti sem fram fer dagana 29. september til 2. október næst komandi í Uppsala í Svíþjóð.

Damkörfestival 2016 er haldið af sænska kvennakórnum La Cappella sem fagnar þrjátíu ára afmæli sínu á þessu ári. Alls taka þátt í mótinu tuttugu og sex sænskir kórar auk tveggja gestakóra sem sérstaklega eru boðnir á mótið, þ.e. kvennakórinn Embla frá Noregi og Kvennakór Garðabæjar frá Íslandi.

Dagskrá mótsins er þéttsetin en meðal viðburða eru hátíðartónleikar í Konsert & Kongress höllinni, tónleikamaraþon í Baptisakirkjunni, kórtónleikar í Dómkirkju Uppsala og „workshops" með þekktum kórstjórendum Norðurlandanna.

Það er sannarlega ómetanlegt tækifæri fyrir kórkonur Kvennakórs Garðabæjar, bæði að kynnast norrænni kvennakórhefð sem er með þeim fremstu í dag og ekki síður að efla tengslanetið.

Fréttir af ferðinni verða jafnóðum settar inn á fésbókarsíðu kórsins. Stefnt er á að halda opna æfingu áður en haldið er til Svíþjóðar sem verður auglýst þegar nær dregur.

Sautjánda starfsár Kvennakórs Garðabæjar sem nú er hafið verður fyrir utan Svíþjóðarferð, með hefðbundnu sniði, aðventutónleikar, Þorravaka og vortónleikar auk ýmissa söngviðburða yfir starfsárið.

Aðalfundur Gígjunnar verður haldinn laugardaginn 1. október 2016 í söngskólanum Domus Vox, Laugavegi 116 Reykjavík kl. 15:30.

Formannafundur verður haldinn kl. 13:00.

Stjórn Gígjunnar vonast til að sjá fulltrúa frá sem flestum aðildarkórum.

Dagskrá aðalfundar

1. Skýrsla stjórnar
2. Reikningar
3. Umræða um skýrslu og reikninga
4. Tillögur og lagabreytingar
5. Ákvörðun árgjalds
6. Kosning formanns
7. Kosning stjórnar og varamanna
8. Kosning tveggja skoðunarmanna reikninga
9. Önnur mál

Lagabreytingar og aðrar tillögur frá aðildakórunum skulu berast stjórn eigi síðan en tveimur vikum fyrir aðalfund.

Aðildakórar Gígjunnar eru hvattir til þess að senda formann og stjórnir sínar á fundinn. Við viljum vekja athygli á að hver kór getur sent eins marga fulltrúa og hann vill á fundinn. Tveir fulltrúar hvers aðildarkórs hafa atkvæðisrétt á aðalfund samkvæmt lögum Gígjunnar.

Stefnumótun Gígjunnar er í höndum aðildarfélaga, aðalfundar og þeirra aðila sem kosnir eru til stjórnunar- og nefndarstarfa, því er mjög mikilvægt að allir kórar sendi fulltrúa sína.

Aðildarkórar eru einnig hvattir til að koma með tillögur að lagabreytingum. Breytingartillögur þurfa að berast eigi síðar en tveimur vikum fyrir fundinn þannig að hægt sé að kynna þær fyrir öðrum kórum með tölvupósti. Vinsamlegast sendið allar tillögur eða hugmyndir að lagabreytingum á netfangið gigjan2003@gmail.com fyrir laugardaginn 17. september.

Miðvikudaginn 25. maí mun Kvennakór Garðabæjar halda sína árlegu vortónleika. Kórinn mun syngja í sinni heimabyggð í tilefni af fjörutíu ára afmæli Garðabæjar og verða tónleikarnir í Kirkjuhvoli, safnaðarheimili Vídalínskirkju og hefjast kl. 20.

Efnisskráin verður einkar fjölbreytt að vanda, þar sem flutt verða klassísk kórverk í bland við léttari tónsmíðar. Fjórir hljóðfæraleikarar úr Sinfóníuhljómsveit Íslands spila með kórnum í nokkrum verkanna.

Auður Hafsteinsdóttir, fiðla
Helga Björg Björgvinsdóttir, fiðla
Pétur Grétarsson, slagverk
Steef van Oosterhout, slagverk
Sólveig Anna Jónsdóttir, píanó

Kórstjóri og listrænn stjórnandi tónleikanna er sópransöngkonan Ingibjörg Guðjónsdóttir.

Miðaverð í forsölu er 2.500 krónur og er miðasala hjá kórkonum og á netfanginu kvennakorgb@gmail.com. 

Aðgöngumiðar verða einnig seldir við innganginn á 3.000 krónur meðan húsrúm leyfir.

Kvennakór Garðabæjar er á Facebook
https://www.facebook.com/kvennakorgb/