Landssamband íslenskra Kvennakóra

Kvennakór Suðurnesja heldur vortónleika í Bergi í Hljómahöll þriðjudaginn 3. maí og fimmtudaginn 5. maí nk. og hefjast tónleikarnir kl. 20:00 bæði kvöldin. Kórinn fagnar vori með léttri og skemmtilegri tónlist en annars vegar verða íslensk popp- og dægurlög á dagskránni og hins vegar franskt þema. Af íslenskum lögum má nefna perlur eftir Sigfús Halldórsson auk laga úr smiðjum Hljóma, Sálarinnar, Megasar og Baggalúts. Frá Frakklandi kemur m.a. syrpa úr Vesalingunum (Les Misérables) og Can can sem margir kannast við úr kvikmyndinni Moulin Rouge. 

Stjórnandi kórsins er Dagný Þórunn Jónsdóttir og meðleikari á píanó er Geirþrúður Fanney Bogadóttir. Einsöngvarar á tónleikunum verða Bergný Jóna Sævarsdóttir, Birta Rós Arnórsdóttir, Guðbjörg Guðmundsdóttir og Ína Dóra Hjálmarsdóttir.

Miðaverð við inngang er 3.000 kr. en hægt er að kaupa miða í forsölu á 2.500 kr. hjá kórkonum eða á kvennakorsudurnesja@gmail.com.

Með mikilli tilhlökkun og eftirvæntingu undirbýr Kvennakór Reykjavíkur sig fyrir vortónleika, sem haldnir verða í Langholtskirkju 4. maí n.k. Kórkonur hafa lagt á sig óvenju mikla vinnu við að gera dagskrá vortónleikanna sem glæsilegasta. Ástæðan er sú að kórinn mun taka þátt í keppni sem haldin verður í Lloret de Mar á Spáni 12. – 19. september. Vortónleikagestir munu njóta þeirrar fjölbreyttu tónlistar er þar verður flutt. Eins og oft áður er víða komið við og sungin lög úr ýmsum heimshornum. Þar má nefna tvö lög frá Katalóníu, Canco del pescador de llunes og El ball de Sant Ferriol, Las Amarillas frá Mexíkó, O mio Babbino caro frá Ítalíu, frá Lapplandi hið gullfallega Eatnemen Vuelie og hið magnaða ungverska verk Éjszaka eftir Karai József. Íslenskar perlur eru einnig á efnisskránni, svo sem Salve Regina, sem Hjálmar H. Ragnarsson samdi sérstaklega fyrir Kvennakór Reykjavíkur á sínum tíma, Spinna minni eftir Mist Þorkelsdóttur og Sköpun, fæðing, skírn og prýði eftir Huga Guðmundsson. Þá eru ótalin lög eftir Björn og Benny í Abba, John Lennon, Burt Bacharach og Ómar Ragnarsson svo nokkrir séu nefndir. Það er von okkar að þessi fjölbreytta dagskrá gleðji tónleikagesti okkar og blási þeim vori í brjóst. 

Miðaverð: 3.000 kr í forsölu / 3.500 við innganginn. 
Miðar fást hjá kórkonum, í síma 896 6468 eða á netfanginu postur@kvennakorinn.is

Sjáumst í sumarskapi í Langholtskirkju

Í ár verður Jórukórinn á Selfossi 20 ára og mun halda upp á afmælið með stæl. ,,Við ætlum að efna til stórra og kröftugra tónleika í íþróttahúsi Vallaskóla þann 7. maí kl. 16:00. Þemað verður ABBA og er Stefán Þorleifsson, stjórnandinn okkar, búinn að útsetja fullt af lögum af tilefninu." segir Laufey Ósk formaður Jórukórsins. ,,Þetta verða engir venjulegir kórtónleikar. Við erum búnar að panta hljóðnema fyrir hverja konu, ljósasýningu og hljóðkerfi hjá EB kerfum. Einnig verður með okkur Jóhanna Guðrún söngkona og sex manna hljómsveit sem mun ekkert gefa eftir." Á dagskránni verður, auk ABBA, einnig brot af því besta frá sögu kórsins. Forsala miða er hafin á Verónu hársnyrtistofu á Selfossi og hjá kórkonum. ,,Okkur þætti vænt um að fá sem flesta til að fagna með okkur."

Ástin, vorið og þú.

Kvennakór Hafnarfjarðar heldur vortónleika sína í Hásölum við Strandgötu fimmtudaginn 28. apríl kl. 20:00.

Yfirskrift tónleikanna er Ástin, vorið og þú sem er tilvísun í fallegan texta Tómasar Guðmundssonar, Ég leitaði blárra blóma. Rómantík og ást mun svífa yfir vötnunum og kórinn ætlar að flytja ykkur fallega tónlist frá ýmsum heimsálfum. Má þar nefna hugljúf sönglög alla leið frá Japan og Kóreu, taktfasta tóna frá Jamaíka og Botswana og lög eftir ungverska tónskáldið, Zoltán Kodály. Að auki verða á dagskrá tónleikanna hefðbundin íslensk og erlend söng- og dægurlög.

Stjórnandi Kvennakórs Hafnarfjarðar er Erna Guðmundsdóttir, Antonía Hevesi leikur á píanó en aðrir hljóðfæraleikarar sem koma fram á tónleikunum eru Kristrún Helga Björnsdóttir sem leikur á flautu, Jón Björgvinsson á slagverk og Snorri Örn Arnarson á bassa.

Miðar verða seldir í forsölu á 2.500 kr. og fer miðasala fram hjá kórkonum. Einnig má senda tölvupóst á kvennakor.hafnarfjardar@gmail.com eða skilaboð á Facebook síðu kórsins

Miðaverð við innganginn er 3.000 kr., frítt er fyrir börn 12 ára og yngri.

Við bjóðum ykkur að fagna vorkomunni á tónleikum með Kvennakór Hafnarfjarðar og þiggja kaffi og konfekt í tónleikahléi.