Landssamband íslenskra Kvennakóra

Freyjukórinn í Borgarfirði hefur undanfarnar vikur staðið í stífum æfingum fyrir geisladiskaupptökur. Rétt fyrir skömmu skelltu þær sér í hljóðver og tóku upp. Freyjukórinn stefnir að því að gefa út nýjan geisladisk með vorinu og við hlökkum til þess að frétta meira af honum.

Fréttatilkynning frá Freyjukórnum í Borgarfirði
Laugardaginn 11. mars flykktust konur af öllu Borgarfjarðarsvæðinu til Reykjavíkur, nánar tiltekið í Rauðagerði, húsnæði FÍH. Freyjukórinn var þar á ferð og mætti í salinn fyrir kl. 10:00 og hófust upptökur um kl. 11:00 og stóðu til kl 19:00. Eins tíma matarhlé var gert til að skreppa á Heitt og kalt á Grensásveginum auk stuttra pása inn á milli. Kerlurnar voru hlaðnar nornadrykkjum fyrir hálsinn, ávöxtum og hálstöflum. Skipaðir voru einkaþjálfarar sem héldu uppi reglubundnum æfingum fyrir kórfélaga. Stjórnandi kórsins Zsuzsanna Budai stýrði kórnum að sinni einstöku list. Haukur Gíslason vafði fungur og spilaði á kontrabassa og Steinunn Árnadóttir spilaði á flýgil.
Þegar líða tók að síðari hluta virtust allar þyrlur landsins vera á æfingaflugi fyrir húsnæðinu og einhver óvenjulegur hljómur var farinn að koma úr flyglinum. Eftir að hafa varið hluta tímans í að finna lækningu á flyglinum og að lokka þyrlurnar frá staðnum tókst að halda áfram og taka upp þau lög sem stefnt var á í upphafi.
Upptökustjóri var Vilhjálmur Guðjónsson. Það vakti almenna kátínu kórfélaga þegar fimm sekúndur voru liðnar frá flutningnum og þumalinn lyftist upp... eins var það ekki eins gott þegar hann hélt áfram að horfa á tækin... greinilega ekki sáttur! Sem sagt um 30 kórfélagar Freyjukórins voru sáttir með daginn og bíða nú spenntir eftir að fá að hlusta á árangurinn (en um leið svolítið kvíðnir!).

Freyjukórinn í Borgarfirði netfang: husafell(hjá)husafell.is

Á heimasíðu Gígjunnar hér efst hægra megin er nú að finna tengil (Tónlistarbrunnur) yfir á heimasíðu Íslenskrar Tónverkamiðstöðvar í Reykjavík. Tengillinn vísar á lista yfir þau lög og tónverk fyrir kvennakóra sem Tónverkamiðstöðin hefur til sölu. Alls eru þetta um 100 titlar. Hægt er að skoða nótur af fyrstu nótasíðu hvers lags og senda Tónverkamiðstöðinni póst með nánari fyrirspurnum og pöntunum.

Samstarf Gígjunnar og Tónverkamiðstöðvar
Gígjan og Tónverkamiðstöðin munu á næstunni hefja samstarf um að vista lög sem Gígjan hefur flutningsrétt á inni á sérstöku vefsvæði hjá Tónverkamiðstöðinni. Með ákveðnu lykilorði munu allir aðildarkórar Gígjunnar fá þar aðgang og geta prentað út lögin sér að kostnaðarlausu. Í upphafi munu verða þar lög sem samin hafa verið, eða útsett fyrir Landmót íslenskra kvennakóra og lög sérstaklega samin fyrir ákveðna kóra, en stefnt er að því að koma upp upplýsingum og vönduðum netbanka með lögum fyrir kvennakóra. Málið er enn í vinnslu og við munum láta vita þegar þessi síða er orðin aðgengileg aðildarkórum Gígjunnar.
Þær sem vilja senda fyrirspurnir eða ábendingar til Nótunefndar, vinsamlegast hafið samband við Sigrúnu Óskarsdóttur; sigrun(hjá)brostu.com

kær kveðja, Nótunefnd Gígjunnar;
Sigrún Óskarsdóttir
Sigurbjörg Aðalsteinsdóttir
Margrét Bóasdóttir

Nánari upplýsingar um nótunefnd Gígjunnar er að finna undir síðunni "Nefndir".

Kvennakór Garðabæjar stendur fyrir dansleik föstudaginn, 10. mars í Veitingahúsinu Glæsibæ. Það er enginn annar en Bogomil Font, ásamt stórhljómsveit, sem mun spila fyrir dansi. Húsið verður opnað kl. 22:00 og byrjar hljómsveitin að spila um hálftíma síðar. Miðasala verður við innganginn og er miðaverð aðeins 2500 kr. Hægt verður að kaupa vínveitingar á staðnum fyrir þá sem þess óska. Þetta er einstakt tækifæri til að dusta rykið af dansskónum og skemmta sér og styðja í leiðinni blómstrandi starfsemi Kvennakórs Garðabæjar. Við hlökkum svo sannarlega til að sjá ykkur!

Námskeiðið "Lærðu að lesa nótur - fyrir fullorðna" er sérhannað fyrir kórfólk sem langar að læra grundvallaratriði nótnalesturs. Atriði eins og formerki, tóntegundir, lykla, nótnalengdir og svo framvegis. Kennari er Bragi Þór Valsson, en hann er með Mastersgráðu í kórstjórn og mikla reynslu af starfi með kórum um allan heim. Hægt er að skrá sig á námskeið hjá Braga, en þau eru haldin öðru hvoru á veturna.

Tilboð til aðildarkóra Gígjunnar
Aðildakórum Gígjunnar er boðið að fá námskeiðið sett sérstaklega upp fyrir sig (fyrir kórinn í heild sinni eða að minnsta kosti 12 manna hóp innan kórsins eða innan kóra á svæðinu). Fyrir landsbyggðarkóra væri hægt að setja námskeiðið upp sem helgarnámskeið þar sem er farið í gegnum allt námsefnið á laugardegi og sunnudegi, í stað hins hefðbundna námskeiðs sem er haldið á kvöldin einu sinni í viku og tekur sex vikur. Kórar á höfuðborgarsvæðinu geta eins fengið sett upp fyrir sig helgarnámskeið ef áhugi er og þá gæti það farið fram annaðhvort í æfingahúsnæði viðkomandi kórs eða í kennsluaðstöðu námskeiðsins í Lindaskóla í Kópavogi.
Allar upplýsingar um námskeiðið má finna hér: http://www.stjornandi.com/namskeid Til að skrá sig eða fá nánari upplýsingar má hafa samband beint við Braga í tölvupóstfangið bragi(hjá)stjornandi.com eða í síma 699 5255.
Nokkrar athugasemdir frá nemendum: "Ekki spurning að þetta hefur hjálpað heilmikið. Nóturnar líta ekki lengur út sem latína og kóræfingar verða auðveldari.". "Ég er búin að læra fullt sem ég kunni ekki." "Þetta var í alla staði mjög gott námskeið." "Þetta veitir góða innsýn í lestur á nótum. Ég er fljótari að ná lögunum en áður." "Ég næ að æfa mig meira á píanó heima og get notfært mér kunnáttuna á æfingum frekar en ein heima." "Ég er örugglega betur búinn til að æfa mig heima og skil betur út á hvað þetta gengur." "Hefur rifjað vel upp það sem ég kunni fyrir og bætti nýju við. Hjálpar örugglega við nótnalestur." "Mér fannst spurningum svarað vel og skýrt. Gott námsefni." "Ég verð áreiðanlega mun öruggari í framtíðinni að vinna í minni rödd."