Landssamband íslenskra Kvennakóra

Kvennakór Garðabæjar fór á landsmót kvennakóra á Akureyri

Helgina 9.-11. maí var glatt á hjalla á Akureyri, en þá var landsmót kvennakóra haldið þar í bæ með þátttöku 700 syngjandi kvenna, kórstjóra og tónlistarfólks. Þar var einnig gestakór frá Noregi og höfðu norsku konurnar á orði hvað íslenskar konur væru upp til hópa með líflegt og skemmtilegt tjáningarform í söngnum.

Kvennakór Akureyrar á mikið hrós skilið
Landsmótin hafa verið haldin á þriggja ára fresti, en kvennakór Akureyrar stóð að þessu móti og voru móttökur og viðbúnaður eins og best var á kosið og á Kvennakór Akureyrar mikið lof skilið fyrir frábæra vinnu.

Allir tónleikarnir fóru fram í tónlistarhúsinu Hofi en æfingar kóranna voru á nokkrum stöðum í bænum.

Til að gera langa sögu stutta fékk Kvennakór Garðabæjar góðar undirtektir og vakti athygli tónlistargesta fyrir lagaval og flutning, en kórinn flutti fjögur lög undir stjórn Ingibjargar Guðjónsdóttur.

Nýr kórbúningur
Kórkonur fengu einnig nokkra athygli fyrir nýja kórbúninginn en þær skörtuðu norðurljósa yfirvarpinu frá Buddu-design sem er gert úr handmáluðu silki. Þessi búningur kórsins var vígður á Jazzhátíð Garðabæjar í lok síðasta mánaðar en þá tók kórinn þátt í lokatónleikum hátíðarinnar.

Margar æfingar og tónleikar á tveimur sólarhringum
Fyrirkomulagið á kóramótinu var þannig að kórarnir fluttu hver um sig 3-4 lög á tónleikum á laugardeginum. Á sunnudeginum voru tónleikar hverrar söngsmiðju fyrir sig þar sem flutt voru þau þrjú lög sem æfð höfðu verið tvo daga í smiðjunum. Og að lokum voru sameiginlegir tónleikar allra kóranna, þar sem þessar 700 konur sungu saman undir stjórn Guðmundar Óla Gunnarssonar, stjórnanda Sinfóníuhljómsveitar Norðurlands og tónlistarstjóri íslensku óperunnar.

Kórstjóri Kvennakórs Garðabæjar með söngsmiðju
Kórinn tók þátt í söngsmiðju ásamt tveimur öðrum kórum sem bar heitið Spunasmiðja og var undir stjórn Eyþórs Inga Jónssonar, organista í Akureyrarkirkju og stjórnanda kammerkórsins Hymnodia. Þar fengu kórarnir það verkefni að spinna með takti, tónum og látbragði í kringum hefðbundin kórlög og var það mjög lærdómsrík og skemmtileg reynsla.

Ingibjörg Guðjónsdóttir kórstjóri tók að sér söngsmiðju á landsmótinu sem bar heitið Norræn kvennakóralgasmiðja og kom í hennar hlut að æfa tvo kóra sem síðan fluttu þessa norrænu tónlist á tónleikum.

Vortónleikar framundan
Þriðjudaginn 20. maí kl. 20:00 verða vortónleikar Kvennakórs Garðabæjar haldnir í Guðríðarkirkju í Grafarholti. Miðar verða seldir við innganginn og er miðarverð 2500 krónur.

Netfang kvennakórs Garðabæjar: kvennakorgb@gmail.com
Vefsetur Kvennakórs Garðabæjar: http://www.kvennakor.net/

Einnig að hægt að fylgjast með starfssemi kórsins á facebook síðu Kvennakórs Garðabæjar:
https://www.facebook.com/kvennakorgb

Kvennakórinn Ymur á Akranesi heldur vortónleika 15. maí og bera þeir yfirskriftina "Ykkar fegursta ljóðalag". Tónleikarnir verða í Tónbergi, Dalbraut 1, Akranesi og hefjast kl. 20:30.

Dagskráin er fjölbreytt og mega tónleikagestir eiga von á bæði íslenskum og erlendum perlum bæði úr heimi kvikmynda og vinsælla dægurlaga. Þórdís Skúladóttir og Jónína Björg Magnúsdóttir syngja einsöng.

Stjórnandi Kvennakórsins Yms er Sigríður Havsteen Elliðadóttir og Birgir Þórisson leikur á píanó. Um 18-20 konur starfa nú með Kvennakórnum Ym en kórinn er nýkomin heim af Landsmóti íslenskra kvennakóra á  Akureyri þar sem u.þ.b. 700 konur tóku þátt. Miðaverð á tónleikana er 2000 krónur fyrir fullorðna og 1.500 krónur fyrir elli- og örorkulífeyrisþega og fer miðasala fram við innganginn.

Kvennakór Reykjavíkur undirbýr nú vortónleika sem haldnir verða 15. og 17. maí í Digraneskirkju. 

Andi tónleikanna verður á vorlegum og glaðlegum nótum, léttleikandi tónlist við allra hæfi svo jafnvel má búast við að tónleikagestir taki undir. Á dagskránni verða fjölbreytt sönglög á vorlegum og glaðlegum nótum, bæði innlend og erlend. 

Eins og oft áður er komið víða við og eiga gestir von á að heyra allt frá lögum ABBA og Megasar til framandi stórskemmtilegra laga frá Japan, Serbíu og Noregi. Hin gullfallegu lög Cantemus hins ungverska Bárdos Lajos og Seal Lullaby eftir Eric Whitacre eru í sérstöku uppáhaldi kórsins í vor.  Bjóðum alla hjartanlega velkomna á tónleikana til okkar að syngja inn sumarið.

Tónleikarnir hefjast kl. 20 fimmtudaginn 15. maí og kl. 17 laugardaginn 17. maí.

Miðaverð er kr. 2500.- í forsölu og kr. 3000.- við innganginn. 

Miðar fást hjá kórkonum, í síma 8966468 eða á postur@kvennakorinn.is

Viva la Musica !

Gígjan, landssamband íslenskra kvennakóra, stendur fyrir landsmótum kvennakóra á þriggja ára fresti. Helgina 9.-11. maí næstkomandi verður landsmótið, sem er það níunda í röðinni, haldið á Akureyri og sér Kvennakór Akureyrar um skipulagningu og framkvæmd þess. Tuttugu kvennakórar víðsvegar að af landinu hafa skráð sig til þátttöku og einn gestakór kemur frá Noregi. Búist er við 700 syngjandi konum til Akureyrar þessa helgi.

Unnið verður í sex söngsmiðjum á mótinu og afraksturinn fluttur í stærri sal menningarhússins Hofs sunnudaginn 11. maí. Auk þess sameinast kórarnir allir á sviði ásamt hljómsveit og flytja saman fjögur lög, meðal annars verður frumflutt lag Huga Guðmundssonar tónskálds við texta Jakobínu Sigurðardóttur, Vor í garði. Segja má að forsmekkurinn að þessum stórtónleikum verði laugardaginn 10. maí þegar hver kór fyrir sig flytur sína efnisskrá á tónleikum.

Þessi viðburður mun án efa setja sterkan svip á bæjarlífið á Akureyri þessa helgi og söngurinn kemur til með að óma um bæinn. Miðasala á tónleikana er hafin á vefslóðinni menningarhus.is.