Landssamband íslenskra Kvennakóra

Fimmtudagskvöldið 14. nóvember síðast liðið stóð Bessastaðasókn fyrir glæsilegum tónleikum í Bessastaðakirkju til styrktar kaupum á línuhraðli fyrir Landsspítalann. Línuhraðall er tæki sem notað er við geislameðferð krabbameinssjúkra. Enginn aðgangseyrir var á tónleikana en frjáls framlög voru vel þegin og allir sem að tónleikunum komu gáfu vinnu sína.

Tónlistarfólk frá Álftanesi
Á tónleikunum komu fram fjölmargir tónlistarmenn sem allir, á einhvern hátt, tengjast Álftanesi. Boðið var upp á fjölbreytta dagskrá; einleik á klarinett og þverflautu, dúett á klarinett og píanó, einsöng, jazz-gítar-tríó og kórsöng.

Bæjarlistamaður söng einsöng með Kvennakór Garðabæjar
Ingibjörg Guðjónsdóttir, sópransöngkona og bæjarlistamaður Garðabæjar, söng einsöng með Kvennakór Garðabæjar en hún er jafnframt stofnandi og stjórnandi kvennakórsins. Kórinn söng auk þess tvö lög undir stjórn Ingibjargar. Meðleikari með kórnum var Sólveig Anna Jónsdóttir, píanisti og aðstoðarskólastjóri Tónlistarskóla Garðabæjar. Í lok tónleikanna fluttu Álftanesskórinn og Kvennakór Garðabæjar saman verkið Ave Maria eftir Giulio Caccini (1551–1618). Kvennakór Garðabæjar þakkar kærlega fyrir sig og vonar að söfnun kvöldsins hafi gengið vel.

Jólamerki til styrktar BUGL
Kvennakórinn hefur hafið sölu á fallegu rauðu jólamerki. Nú gefst velunnurum kórsins færi á að styrkja ferðasjóð kórsins og á sama tíma starfssemi Barna- og unglingadeildar Landsspítala, en hluti ágóða rennur til BUGL. Jólamerkið kostar 1000 kr. og er til sölu hjá kórkonum. Einnig er hægt að panta merkið með því að senda póst á netfangið; kvennakorgb@gmail.com

Næstu viðburðir Kvennakórs Garðabæjar
• 1. desember: Vídalínskirkja kl. 20:00, söngur á aðventukvöldi
• 9. desember: Digraneskirkja kl. 20:00, Aðventutónleikar
• 15. desember: IKEA kl. 17:30-18:30, jólasöngur fyrir gesti í IKEA

Kvennakór Garðabæjar er á facebook
Hægt er að fylgjast með starfssemi kórsins og viðburðum á hans vegum á facebook síðu Kvennakórs Garðabæjar: https://www.facebook.com/kvennakorgb

Kvennakórinn Vox feminae fagnar 20 ára starfsafmæli þann 22. nóvember næstkomandi með söngferð til Parísar dagana 21. – 25. nóvember.

Í þessari fyrstu söngferð Vox feminae til Parísar verður sérstök áhersla lögð á að kynna íslenska tónlist sem er Íslendingum sérlega hjartfólgin, eftir tónskáldin Þorkel Sigurbjörnsson, Sigvalda Kaldalóns, Hjálmar H. Ragnars og fleiri. Auk þess flytur kórinn trúarlega og veraldlega tónlist eftir erlend tónskáld, svo sem César Franck, Gabriel Fauré, Josef Rheinberger og fleiri.

Með í för verða þær Sigrún Hjálmtýsdóttir sópran og Guðný Einarsdóttir píanóleikari. Stjórnandi Vox feminae frá upphafi er Margrét J. Pálmadóttir.

Í París heldur kórinn tónleika í elstu kirkju Parísarborgar, Saint-Germain de Prés, fimmtudaginn 21. nóvember. Þá mun kórinn syngja tvisvar í Notre Dame, fyrst á hádegistónleikum föstudaginn 22. nóvember en einnig við hádegismessu degi síðar.

Miðvikudaginn 13. nóvember ætlar Vox feminae að halda kveðjutónleika í Grensáskirkju þar sem gestum gefst kostur á að hlýða á hluta þess efnis sem kórinn hyggst flytja í París. Tónleikarnir í Grensáskirkju hefjast kl. 20:30 og aðgangseyrir er 2.000 krónur. Miðasala er hjá kórfélögum og við innganginn.

Laugardaginn 9. nóvember heldur Kvennakórinn Ymur kórahitting. Gestir Yms verða Kvennakór Hafnarfjarðar og Freyjukórinn úr Borgarfirði.

Kórarnir ætla að eyða deginum saman frá kl. 13:00 og halda sameiginlega tónleika kl. 17:00 í Tónbergi, sal Tónlistarskóla Akraness. Aðgangseyrir er kr. 1.500.

Eftir tónleika verður svo matur og skemmtun í Miðgarði í Hvalfjarðarsveit.

Aðalfundur Gígjunnar var haldinn laugardaginn 26. október í söngskólanum Domus Vox. Auk venjulegra aðalfundarstarfa var heiðursviðurkenning Gígjunnar afhent en að þessu sinni var það Gróa María Þorvaldsdóttir úr Kvennakór Reykjavíkur sem hlaut viðurkenninguna. Fulltrúar Kvennakórs Akureyrar héldu síðan kynningu á Landsmóti íslenskra kvennakóra sem verður haldið á Akureyri helgina 9. - 11. maí 2014.

Stjórn Gígjunnar

Á fundinum var kosin ný stjórn Gígjunnar en hana skipa þær Þórhildur G. Kristjánsdóttir formaður, Kvennakór Hornafjarðar, Steiney Halldórsdóttir og Ragnheiður Helgadóttir úr Kvennakór Hafnarfjarðar, Dagbjört Ottósdóttir, Kvennakórnum Léttsveit Reykjavíkur og Guðlaug Ásgeirsdóttir, Kvennakórnum Heklunum. Í varastjórn eru þær Snæfríð Egilson og Anna Breiðfjörð Sigurðardóttir úr Kvennakór Akureyrar og Kolbrún Halldórsdóttir, Kvennakór Reykjavíkur. Skoðunarmenn reikninga eru þær Margrét Hreinsdóttir, Kvennakór Reykjavíkur og Jóna Björg Kristinsdóttir, Kvennakórnum Ym.

Anna Laxdal Þórólfsdóttir, Kvennakór Reykjavíkur, sem hefur gegnt embætti formanns síðustu tvö árin, Dagný Þrastardóttir, Kvennakór Ísafjarðar, meðstjórnandi og Anna Guðrún Gylfadóttir, Kvennakór Ísafjarðar, varamaður í stjórn, gengu úr stjórn á fundinum. Gígjan færir þeim bestu þakkir fyrir þeirra störf.

Heiðursviðurkenning Gígjunnar

Heiðursviðurkenning Gígjunnar var nú afhent fjórða árið í röð. Hugmyndin með afhendingu hennar er að vekja athygli á því hversu gott og fórnfúst starf margar kórkónur vinna í sínum kórum. Án þessara kvenna væri starf kvennakóra ekki mögulegt. Þetta eru sannkallaðar hvunndagshetjur.

Það var Gróa María Þorvaldsdóttir úr Kvennakór Kópavogs sem hlaut heiðursviðurkenningu Gígjunnar 2013. Hér á eftir fer umsögn Kvennakórs Kópavogs um Gróu:

Gróa María er einn af stofnfélögum og hefur starfað með Kvennakór Kópavogs frá 2002. Hún hefur verið virk í starfi kórsins frá upphafi og setið í stjórn og ýmsum nefndum hans og ávallt leyst mál kórsins á farsælan hátt. Gróa María ber með sér léttleika og jákvæðni sem nýtist vel í kórstarfinu og hefur unnið ötullega að farsæld og framgangi hans. Hún er einnig ein af þeim konum sem alltaf eru boðnar og búnar til að koma til aðstoðar þegar krefjandi verkefni kalla á aukavinnu.

Gróa María var einn hugmyndasmiða að styrktartónleikunum Hönd í Hönd sem kórinn hefur haldið fyrir Mæðrastyrksnefnd Kópavogs undanfarin fjögur ár. Þetta árið verða fimmtu tónleikarnir haldnir 3. nóvember. Hugmyndin að þessum tónleikum var bág staða margra fjölskyldna í kjölfar bankahrunsins 2008. Vildu kórkonur finna vettvang til að styðja við bæjarbúa í því erfiða ástandi sem skapaðist þá. Á þessum árum hefur Kvennakór Kópavogs fengið til liðs við sig fjölmarga þekkta listamenn og hefur styrkur til Mæðrastyrksnefndarinnar verið álitlegur ár hvert. Það er ekki síst að þakka konum eins og Gróu Maríu en framlag hennar hefur haft mikil áhrif á hve vel heppnaðir þessir tónleikar hafa verið ár eftir ár.

Stjórn Kvennakórs Kópavogs vill þakka Gróu Maríu fyrir þá velvild og umhyggju sem hún sýnir samfélaginu og fórnfúst og gott starf fyrir kórinn sinn. Við viljum því leggja til að hún fái heiðursviðurkenningu Gígjunnar 2013.

Landsmót íslenskra kvennakóra á Akureyri 9. - 11. maí 2014

Þær Snæfríð Egilson og Anna Breiðfjörð Sigurðardóttir frá Kvennakór Akureyrar mættu á fundinn og kynntu Landsmót íslenskra kvennakór sem verður haldið á Akureyri helgina 9. - 11. maí 2014. 

Kynninguna má skoða hér.