Landssamband íslenskra Kvennakóra

Kvennakór Reykjavíkur auglýsir vortónleika kórsins í Fella- og Hólakirkju, 26. maí 2013, kl. 17:00. 

Kvennakór Reykjavíkur var stofnaður 1993 og heldur upp á tuttugu á afmæli sitt í ár.
Til að fagna þessum tímamótum hélt kórinn tónleika, sem báru nafnið Frá konu til konu í Eldborgarsal Hörpu ásamt öllum kórum, sem starfað hafa í tengslum við Kvennakór Reykjavíkur. Og nú er komið að því að fagna með vortónleikum kórsins réttum tuttugu árum eftir fyrstu tónleika hans.

Vortónleikarnir bera keim vorkomu og gleði. Litið er um öxl og rifjuð upp lög frá tuttugu ára ferli í bland við nýtt efni. Sungin verður íslensk tónlist, gömul og ný. Ísland farsælda Frón, þjóðlag við ljóð Jónasar Hallgrímssonar; Þó þú langförull legðir eftir Sigvalda Kaldalóns við ljóð Stephans G. Stephanssonar; Breyttur söngur eftir Þóru Marteinsdóttur við ljóð Huldu og Líttu sérhvert sólarlag, lag og ljóð eftir Braga Valdimar Skúlason. Í erlenda lagavalinu er mikil fjölbreytni. Hátíðleg, skemmtileg, ljúf og létt tónlist og jafnvel má búast við einhverju óvæntu. Víst að allir finna þar tónlist við sitt hæfi.

Stjórnandi Kvennakórs Reykjavíkur er Agota Joó. Píanóleik annast Vilberg Viggósson og Hávarður Tryggvason leikur á kontrabassa.

Miðaverð: 3000 kr. / 2500 kr. í forsölu. Miðar fást hjá kórkonum, í síma 8966468 eftir kl. 17 eða á www.kvennakorinn.is

Kvennakór Akureyrar sækir Blönduós heim þann 25. maí næstkomandi en þá heldur kórinn sína fyrri vortónleika í Blönduóskirkju kl. 15:00. Síðari vortónleikarnir verða daginn eftir þann 26. maí í Menningarhúsinu Hofi á Akureyri kl. 16:00. Báðir tónleikarnir hafa yfirskriftina „Sólin þaggar þokugrát“, en það er tilvísun í eitt af lögunum sem eru á efnisskránni í ár og hefur einnig skírskotun í komandi sumar og sól.

Kvennakór Akureyrar var stofnaður á vordögum 2001. Í kórnum starfa nú um 60 konur frá Akureyri og nærsveitum. Fyrsti stjórnandi Kvennakórsins var Björn Leifsson, en hann stjórnaði kórnum til 2003 þegar Þórhildur Örvarsdóttir tók við. Arnór Vilbergsson stjórnaði kórnum frá 2005 til 2008, en Jaan Alavere á haustönn 2008. Núverandi stjórnandi frá því í janúar 2009 er Daníel Þorsteinsson. Frá haustinu 2011 er formaður kórsins Una Þórey Sigurðardóttir. 

Kórinn hefur á að skipa öflugum og skemmtilegum konum á öllum aldri sem eiga það sameiginlegt að hafa gaman af því að syngja saman, fyrir sig og aðra.
Tónleikar eru haldnir nokkrum sinnum á ári og farið í söngferðalög reglulega utan sem innanlands. Kórinn hefur þrisvar lagt land undir fót og farið utan, fyrst til Slóveníu, svo til Eistlands og síðasta haust fór kórinn vestur um haf til Kanada þar sem hann söng m.a. við hátíðarhöld á Íslendingadeginum í Gimligarði. Þessa dagana vinnur kórinn að undirbúningi landsmóts kvennakóra sem haldið verður vorið 2014.

Kvennakór Akureyrar er þekktur fyrir mjög fjölbreytt lagaval, hann tekst á við skemmtileg og ögrandi verkefni af ýmsu tagi og fer ekki alltaf troðnar slóðir í þeim efnum. Á efnisskránni í ár má finna íslensk þjóðlög, sótt í smiðju sr. Bjarna Þorsteinssonar á Siglufirði, sænsk og norsk þjóðlög, amerískan gospelsöng, enskan madrigala frá 16. öld, aríu eftir Bach, Ave Maria eftir ungverskt tónskáld á 20. öld, jazzsmell frá Dave Brubeck kvartett og svo mætti lengi telja. Nýjasta lagið á efnisskránni var samið fyrir 10 ára afmæli Gígjunnar, landssambands íslenskra kvennakóra í apríl s.l. Lagið er eftir Þóru Marteinsdóttur við ljóð Huldu skáldkonu sem nefnist Breyttur söngur. Margir kvennakórar landsins hafa tekið þetta lag á sína efnisskrá en þetta verður frumflutningur Kvennakórs Akureyrar á því og líklega frumflutningur hér norðan heiða.

Tónleikarnir í Blönduóskirkju, laugardaginn 25. maí, hefjast sem fyrr segir kl. 15:00 en tónleikarnir í Hofi sunnudaginn 26. maí kl. 16:00. Aðgangseyrir er kr. 2500.- en ókeypis fyrir börn að 14 ára aldri. Kórstjóri og undirleikari er Daníel Þorsteinsson.

Kvennakórinn Seljur kemur fram á tónleikum í Áskirkju ásamt Strætókórnum miðvikudaginn 15. maí. Á dagskrá eru létt og ljúf lög.

Stjórnandi Seljanna er Svava Kristín Ingólfsdóttir og meðleikari á píanó er Arnhildur Valgarðsdóttir.

Tónleikarnir hefjast kl. 20:00.

Kvennakór Garðabæjar heldur árlega vortónleika sína sunnudaginn 12. maí í Guðríðarkirkju, Grafarholti og hefjast tónleikarnir kl. 17. Yfirskrift söngdagskrárinnar er „sumarlegt og seiðandi“ sem endurspeglast í fjölbreyttu lagavali og litríkum söng kórsins. Sérstakur gestur er Jón Rafnsson, kontrabassaleikari en píanóleikari kórsins er Sólveig Anna Jónsdóttir og kórstjóri er Ingibjörg Guðjónsdóttir. 

Forsala aðgöngumiða er hjá kórkonum og á netfanginu kvennakor@kvennakor.is. Forsöluverð er 2000 kr. en 800 kr. fyrir börn 16 ára og yngri. Miðaverð við innganginn er 2500 kr. Allar nánari upplýsinga um kórstarfið má finna á www.kvennakor.net og á facebook síðu kórsins. 

Kvennakór Garðabæjar heldur árlega vortónleika sína sunnudaginn 12. maí í Guðríðarkirkju, Grafarholti og hefjast tónleikarnir kl. 17:00.

Yfirskrift söngdagskrárinnar er „sumarlegt og seiðandi“ sem endurspeglast í fjölbreyttu lagavali og litríkum söng kórsins.

Sérstakur gestur er Jón Rafnsson, kontrabassaleikari en píanóleikari kórsins er Sólveig Anna Jónsdóttir og kórstjóri er Ingibjörg Guðjónsdóttir. 

Forsala aðgöngumiða er hjá kórkonum og á netfanginu kvennakor@kvennakor.is. Forsöluverð er 2000 kr. en 800 kr. fyrir börn 16 ára og yngri.
Miðaverð við innganginn er 2500 kr.