Landssamband íslenskra Kvennakóra

Vox feminae blæs til tónleika og býður vorið velkomið undir yfirskriftinni Hjá mér áttu heima. Tónleikarnir verða haldnir í Laugarneskirkju sunnudaginn 12. maí kl. 20:30 og listrænn stjórnandi er að vanda Margrét J. Pálmadóttir. 

Dagskráin er óður til náttúru lands og þjóðar. Ástsæl þjóð- og alþýðulög skipa öndvegi og að auki verða flutt verk sem samtímatónskáldin Bára Grímsdóttir, Hildigunnur Rúnarsdóttir og Þorkell Sigurbjörnsson hafa samið við þekkt kvæði. 

Þeir sem vilja njóta þessarar stundar með Vox feminae og Margréti J. Pálmadóttur geta nálgast miða í forsölu hjá kórfélögum og í síma 863 4404. Miðaverðið er 2.500 kr. og verða þeir að auki seldir við innganginn meðan húsrúm leyfir.

Salka kvennakór á Dalvík heldur sína árlegu vortónleika í Menningarhúsinu Bergi á Dalvík 11. maí kl. 20:30 og að þessu sinni er kórinn með Júróvísjón þema. Á dagskránni eru 15 ný lög sem eru öll útsett af Páli Barna Szabó stjórnanda kórsins auk þess sem kórinn flytur "Þér við hlið" sem Regína Ósk flutti í Júróvisjón fyrir nokkrum árum en lagið var sungið á síðasta landsmóti kvennakóra. 

Í fyrsta skipti verður hljómsveit að spila undir hjá Sölku auk þess sem kórinn er í samstarfi við tónlistarskólann á Dalvík og fékk til liðs við sig flautu-, saxófón- og fiðluleikara sem stunda þar nám. Hljómsveitina skipa þeir Páll Barna Szabó, Þorvaldur Eyfjörð Kristjánsson og Bjarni Jóhann Valdimarsson.

Þetta verða frábærir tónleikar, með hressum og skemmtilegum íslenskum og erlendum júróvísjónlögum í mjög flottum útsetningum.

Miðaverð er 2.500 kr. 

Kyrjurnar verða með vortónleika fimmtudaginn 9. maí, uppstigningardag, í Seltjarnarneskirkju kl. 17:00.

Yfirskrift tónleikanna er "ástartöfrar…"

Á efnisskránni eru mörg hugljúf lög um ástina bæði innlend og erlend, svo sem eins og "Ástin mín ein", "Ain't Misbehavin" og "Það sem ekki má".

Stjórnandi er Sigurbjörg Hvanndal Magnúsdóttir, píanóleikari er Halldóra Aradóttir.

Miðaverð er 2.500kr. og er miðasala við innganginn.

Kvennakór Suðurnesja heldur vortónleika í Ytri-Njarðvíkurkirkju mánudaginn 6. maí og í Keflavíkurkirkju miðvikudaginn 8. maí og hefjast tónleikarnir kl. 20:00 bæði kvöldin.

Dagskráin verður létt og skemmtileg en þar má finna ýmsa gamla slagara, bæði íslenska og erlenda auk nokkurra nýrri dægurlaga. Meðal annars heiðra kórkonur minningu Ellýjar Vilhjálms og syngja fjögur af lögum hennar í útsetningu Aðalheiðar Þorsteinsdóttur. Einnig mun kórinn flytja lagið "Breyttur söngur" sem Þóra Marteinsdóttir samdi við ljóð Huldu í tilefni af 10 ára afmæli Gígjunnar, landssambands íslenskra kvennakóra þann 5. apríl sl.

Í Kvennakór Suðurnesja, sem átti 45 ára afmæli í febrúar, eru konur úr flestum sveitarfélögum á Suðurnesjum. Stjórnandi kórsins er Dagný Þórunn Jónsdóttir og meðleikari á píanó er Geirþrúður Fanney Bogadóttir. Auk hennar leika á tónleikunum þau Harpa Jóhannsdóttir á bassa, Högni Þorsteinsson á gítar og Þorvaldur Halldórsson á trommur.

Miðaverð er 2000 kr. við innganginn en aðeins 1500 kr. í forsölu sem fer fram hjá kórfélögum og á netfanginu kvennakorsudurnesja@gmail.com.