Landssamband íslenskra Kvennakóra

Vortónleikar Kvennakórsins Léttsveitar Reykjavíkur verða 5. maí í Grafarvogskirkju kl. 17:00. Yfirskrift tónleikanna er "Douze points" en þar flytja 120 Léttur undir stjórn Gísla Magna innlenda og erlenda Eurovision smelli frá ýmsum tímum í bland við aðrar perlur úr dægurlagaheiminum.

Með í för eru Aðalheiður Þorsteinsdóttir, sem annast útsetningar og píanóleik, Tómas R. Einarsson kontrabassaleikari og Kjartan Guðnason trommari. Rúsínan í pylsuendanum er svo einsöngvarinn, sjálf ofurdívan Hera Björk Þórhallsdóttir.

Aðgangseyrir er 2.800 kr.

Léttsveitin styrkir Ljósið, endurhæfingar- og stuðningsmiðstöð fyrir fólk sem hefur fengið krabbamein og aðstandendur þeirra. Markmið Ljóssins er að fólk fái sérhæfða endurhæfingu og stuðning, þar sem fagfólk aðstoðar við að byggja upp líkamlegt og andlegt þrek, auk þess að fá stuðning við að setja sér markmið sem auka daglega virkni og hafa þannig áhrif á lífsgæði almennt. Þátttakendur í Ljósinu koma að eigin frumkvæði og áhuga og raða saman dagskrá sem hentar hverju sinni. Starfsemi Ljóssins er rekin alla virka daga auk þess sem sérskipulögð námskeið eru á kvöldin og laugardögum.

Léttsveitin fer í framhaldi tónleikanna austur á Höfn í Hornafirði og syngur í menningarhúsinu Nýheimum laugardaginn 11. maí. Á leiðinni verður komið við á ýmsum stöðum og sungið af hjartans lyst.

Kvennakór Hafnarfjarðar heldur sína árlegu vortónleika laugardaginn 4. maí undir yfirskriftinni Litir vorsins. Líkt og aðrir vorboðar sem gleðja okkur með söng sínum hyggst kórinn fagna komu vorsins með litríkri söngdagskrá.  

Vetrarstarf kórsins hefur verið öflugt og markast af því að í byrjun júní heldur kórinn í tónleikaferðalag til Portoroz og Bled í Slóveníu þar sem hann mun gefa þarlendum kost á að hlýða á sýnishorn af sönglist íslenskra kvennakóra. Æfingar hafa verið strangar og vel vandað til lagavals en jafnframt hefur verið haldið úti öflugri fjáröflun með kökubösurum og flóamörkuðum. Dagskrá vortónleikanna að þessu sinni litast að einhverju leyti af væntanlegri utanför kórsins þar sem kirkjuleg tónlist og íslensk þjóðlög verða í forgrunni. Að auki verða á efnisskrá vortónleikanna íslensk og erlend söng- og dægurlög og ættu því allir að finna eitthvað við sitt hæfi.

Stjórnandi Kvennakórs Hafnarfjarðar er Erna Guðmundsdóttir og undirleik annast Antonia Hevesi. Tónleikarnir verða laugadaginn 4. maí í Hásölum við Strandgötu og hefjast kl. 16:00. Miðaverð er 2500 krónur og fer miðasala fram hjá kórkonum og við innganginn. Gestum er boðið að þiggja kaffi og konfekt í tónleikahléi.

Tíminn líður hratt, sumarið nálgast og með hækkandi sól fara konur í Kvennakórnum Ljósbrá í Rangárvallasýslu að ókyrrast og vilja láta ljós sitt skína. Að þessu sinni verða tvennir tónleikar haldnir í maí, í Menningarsalnum á Hellu miðvikudagskvöldið 1. maí kl. 20:30 og í Áskirkju í Reykjavík laugardaginn 4. maí kl. 16:00. Aðgangseyrir er kr. 2.000, frítt fyrir 16 ára og yngri. Lagaval er fjölbreytt að venju, gospel, íslensk og erlend dægurlög og íslensk sönglög. Einnig er á efnisskránni nýtt lag, Breyttur söngur, eftir Þóru Marteinsdóttur við ljóð eftir Huldu en lagið er samið í tilefni af 10 ára afmæli Gígjunnar, sambands íslenskra kvennakóra. 
Félagar úr Jassbandi Suðurlands munu sjá um undirleik af sinni alkunnu snilld. Einnig munu einsöngvarar koma fram og er Gyða Pálsdóttir kórmeðlimur þar á meðal. Fríða Hansen, upprennandi söngstjarna úr Rangárþingi, mun taka lagið með kórnum og einnig mætir tenórinn Egill Árni Pálsson á svæðið en hann er ættaður frá Laugarási í Árnessýslu og hefur meðal annars látið rödd sína hljóma í óperuhúsum í Þýskalandi. 
Félagar í Ljósbrá eru 35 og stjórnandi kórsins frá hausti 2011 er Maríanna Másdóttir. 
Láttu þig ekki vanta á tónleika hjá Kvennakórnum Ljósbrá, skemmtilegt og fjölbreytt lagaúrval!

Næstkomandi laugardag, 4. maí heldur Kvennakórinn Seljur sína árlegu vortónleika. 

Á efnisskrá eru létt og ljúf lög. Stjórnandi kórsins er Svava Kristín Ingólfsdóttir og undirleikari á píanó er Arnhildur Valgarðsdóttir. Birgir Bragason leikur á kontrabassa og á saxófón er Hans Jensson.

Tónleikarnir verða í Seljakirkju og hefjast kl. 16:00.

Miðaverð er 1.500 kr.