Landssamband íslenskra Kvennakóra

Gígjan, landssamband íslenskra kvennakóra óskar félögum í aðildarkórum sambandsins gleðilegra jóla, blessunar og friðar með þökk fyrir samstarfið á árinu sem er að líða. Megi nýja árið verða gott til handa kvennakórum landsins og starf þeirra vaxa og dafna með hækkandi sól. 

Kvennakórinn Ymur á Akranesi heldur jólatónleika í Tónbergi sunnudaginn 16. desember kl. 17.00. Flutt verða íslensk og erlend jólalög. 
Stjórnandi er Sigríður Elliðadóttir og undirleikari Lisbeth Dahlin.

Boðið verður upp á heitt kakó, kaffi og smákökur í hléi.

Miðaverð er 2.000 kr. fyrir fullorðna og 1.500 kr. fyrir börn. Ekki verður posi á staðnum.
Forsala aðgöngumiða verður í Bókasafni Akraness. 

Þriðjudagskvöldið 11. desember stendur Gróa Hreinsdóttir kórstjóri fyrir jólalagaflakki um heiminn með fjórum kórum undir hennar stjórn. Þar á meðal eru tveir kórar innan Gígjunnar, Kvennakór Kópavogs og Uppsveitasystur en auk þeirra koma fram Borgarkórinn og Söngfuglar kór eldri borgara. Píanóleikari er Helga Laufey Finnbogadóttir.

Flutt verða jólalög frá flestum heimshornum en þar verða dillandi afrísk lög flutt í bland við hátiðlega evrópska sálma og fjöruga jólasöngva frá Ameríku.

Tónleikarnir verða í Grafarvogskirkju og hefjast þeir kl. 20:30. Aðgangseyrir er kr. 2.500 en hægt er að kaupa miða í forsölu hjá kórunum á kr. 2.000. Frítt er fyrir börn 12 ára og yngri.

Kvennakórinn Léttsveit Reykjavíkur heldur sína sívinsælu aðventutónleika í Langholtskirkju fimmtudaginn 6. desember kl. 20.00 og laugardaginn 8. desember kl. 16.00. Einsöngvari er Hulda Björk Garðarsdóttir en hún hefur komið fram á fjölda tónleika bæði hérlendis og erlendis. Á dagskránni verða gömul og ný jólalög.

Hljómsveitina skipa Aðalheiður Þorsteinsdóttir píanóleikari og hljómsveitarstjóri, Kjartan Guðnason trommuleikari og Tómas R. Einarsson bassaleikari.

Miðaverð er 2.800 krónur og miðasala er í síma 897-1885, á lettsveit@lettsveit.is og meðal kórkvenna.