Landssamband íslenskra Kvennakóra

Jóladiskur Léttsveitar Reykjavíkur „Amma engill“ er kominn út, með 15 fallegum jólalögum undir stjórn Jóhönnu V. Þórhallsdóttur. Kórinn skipa 120 flottar konur sem sungið hafa víða bæði hérlendis og erlendis. Nýverið söng kórinn inn jólin í Hörpu, fyrstur allra kóra. Einsöngvarar með kórnum eru Sigríður Thorlacius og Hildigunnur Einarsdóttir, hljóðfæraleik annast Aðalheiður Þorsteinsdóttir píanó, Kjartan Guðnason slagverk og Tómas R. Einarsson bassa. Fallegur diskur sem kemur öllum í jólaskap. Amma engill jóladiskurinn fæst í 12 tónum. Allir nánari upplýsingar fást hjá Jóhönnu V. Þórhallsdóttur í síma 8999227, í síma Léttsveitarinnar 897 1885 og í tölvupósti á netfangi kórsins.

Frá haustinu 2003 hefur Kvennakór Akureyrar í samvinnu við aðra kóra og tónlistarmenn haldið aðventutónleika til styrktar Mæðrastyrksnefnd Akureyrar. Þar leggja allir sitt af mörkum og gefa vinnu sína til að styrkja gott málefni og rennur ágóðinn óskiptur til Mæðrastyrksnefndar Akureyrar. Í ár verða haldnir veglegir tónleikar í Hamraborginni í Hofi. Þá fær kórinn til liðs við sig góða gesti, þau Guðrúnu Gunnarsdóttur söngkonu og Ívar Helgason, söngvara og leikara. Auk þess spila þeir Aladár Rácz á píanó, Pétur Ingólfsson á kontrabassa og Emil Þorri Emilsson á slagverk. Kórnum stjórnar að venju Daníel Þorsteinsson.

Efnisskráin er fjölbreytt, hugljúf, falleg og jólaleg. Kórinn mun m.a. syngja lag Daníels Þorsteinssonar við texta Önnu Dóru Gunnarsdóttur kórfélaga, sem hann samdi sérstaklega í tilefni af 10 ára afmæli kórsins á þessu ári.

Mæðrastyrksnefnd Akureyrar styður vel við bakið á þeim fjölskyldum og einstaklingum sem eiga um sárt að binda og geta ekki haldið sín jól án stuðnings okkar hinna. Því er nauðsynlegt að allir taki höndum saman og hjálpi nefndinni við þetta göfuga starf.  Fólk er því hvatt til að mæta og hlýða á fallega tóna í flottu og yndislegu umhverfi og styrkja um leið gott málefni.

Tónleikarnir verða haldnir í salnum Hamraborg í Menningarhúsinu Hofiá Akureyri fimmtudaginn 8. desember nk. og hefjast kl. 20:00. Miðaverð er 3000 krónur, en frítt fyrir 14 ára og yngri.

Nánari upplýsingar og miðasala er í Hofi og á vefsíðu Menningarhússins Hofs.

Kvennakór Suðurnesja heldur tvenna jólatónleika þetta árið. Fyrri tónleikarnir verða í Ytri-Njarðvíkurkirkju mánudaginn 5. desember og hinir síðari í Listasal Duushúsa í Reykjanesbæ miðvikudaginn 7. desember. Tónleikarnir hefjast kl. 20 bæði kvöldin.
 Á dagskránni eru jólalög úr ýmsum áttum, bæði íslensk og erlend. Meðal annars mun kórinn flytja lag Suðurnesjatónskáldsins Sigurðar Sævarssonar, Þeir hringdu hljómþungum klukkum, en það var valið jólalag RÚV árið 2010. Einnig verða fluttar jólaperlur eins og Hin fyrstu jól eftir Ingibjörgu Þorbergs, Hvít jól eftir Irving Berlin, Ave Maria eftir J.S. Bach og Leppur, Skreppur og Leiðindaskjóða eftir Gunnar Þórðarson við texta Halla, Ladda og Gísla Rúnars, auk fleiri fallegra og skemmtilegra jólalaga sem munu án efa koma  tónleikagestum í jólaskapið.
Stjórnandi Kvennakórs Suðurnesja er Dagný Þórunn Jónsdóttir og meðleikari á píanó er Geirþrúður Fanney Bogadóttir.
Miðasala er hafin hjá kórkonum og er miðaverð í forsölu kr. 1500. Hægt er að panta miða í forsölu í síma 898 7744 og 897 4776 eða með tölvupósti á netfangið inadora@simnet.is. Einnig verða seldir miðar við innganginn og verður miðaverð þá kr. 2000. Frítt er fyrir börn 14 ára og yngri.

Jólatónleikar Kvennakórsins Kyrjanna verða í Seltjarnaneskirkju, sunnudaginn 4. desember kl. 17:00.
Yfirskrift tónleikanna í ár er "Heilög birta um jól..." Á efnisskránni eru létt og falleg jólalög.
Stjórnandi er Sigurbjörg Hvanndal Magnúsdóttir og píanóleikari Halldóra Aradóttir.

Miðaverð 1900 kr.
Miðasala við innganginn.