Landssamband íslenskra Kvennakóra

Margir vilja ekki heyra minnst á jólin fyrr en 1. desember hið fyrsta. Öðrum veitir ekki af að huga að næstu jólum strax að loknum þeim síðustu. Flestir eru þó sammála um að njóta jólanna og jólastússins hvenær sem undirbúningurinn hefst. Við í Kvennakór Reykjavíkur viljum gera okkar til að bæta á jólastemmninguna og minnum hér á okkar árvissu jólatónleika. Oft höfum við fengið góða gesti til liðs við okkur á tónleikum, bæði einsöngvara og hljóðfæraleikara, en í ár verður fyrirkomulagið með nokkuð breyttu sniði. Heill karlakór mun bætast í okkar fríða hóp. Þetta er Karlakór Kjalnesinga undir stjórn Örlygs Atla Guðmundssonar. Raddir þessa líflega og skemmtilega karlakórs munu blandast okkar í nokkrum fallegum og vel völdum jólalögum, en einnig mun hvor kór um sig flytja sín lög. Saman mynda kórarnir 120 manna hljómmikinn kór með fallega og jólalega dagskrá sem ætti að koma öllum í rétta jólaskapið. Meðal laga á blandaðri efnisskrá má nefna Laudate Pueri e. Mendelssohn, Sálmur 100 e. Tryggva M. Baldvinsson, Jesús þú ert vort jólaljós, The Snow e. Edward Elgar, Jesús þú ert vort jólaljós, Nóttin var sú ágæt ein, Við óskum þér góðra jóla og It´s Beginning to Look a Lot Like Christmas. Allt eru þetta lög sem kveikja minningar um góð jól, og koma fólki í hátíðaskap.

Tónleikarnir verða haldnir í Langholtskirkju, þeir fyrri miðvikudaginn 30. nóvember kl. 20, og hinir síðari laugardaginn 3. desember kl. 16. Miðaverði er stillt í hóf og er forsöluverð hjá kórfélögum beggja kóra kr. 2.500, fyrir börn 6-18 ára kr. 1.500. Við innganginn kostar miðinn kr. 3.000.

Verið velkomin, og góða skemmtun!

Fimmtudaginn 1. desember kl. 20:00 heldur Kvennakór Hafnarfjarðar aðventutónleika í Víðistaðakirkju í Hafnarfirði.

Kvennakór Hafnarfjarðar var stofnaður árið 1995 og er í dag skipaður tæplega 50 konum.  Stjórnandi kórsins frá árinu 2007 er Erna Guðmundsdóttir og píanóleikari er Antonia Hevesi. 

Á efnisskrá kórsins að þessu sinni eru bæði íslensk og erlend jólalög og kirkjulegir söngvar sem spanna langt tímabil í tónlistarsögunni.  Má þar nefna trúarlega tónlist frá 15. öld auk frumflutnings á sjö tékkneskum jólalögum í útsetningu tékkneska tónskáldsins Jiri Ropek.  Þrjú þessara laga hefur Hildigunnur Rúnarsdóttir raddsett sérstaklega fyrir Kvennakór Hafnarfjarðar.

Forsala aðgöngumiða er hjá kórkonum en einnig verða seldir miðar við innganginn.  Miðaverð er kr. 2000.

Upplýsingar um tónleikana og kórinn er einnig að finna á heimasíðu Kvennakórs Hafnarfjarðar.

Að venju er nóg að gera hjá Kvennakór Suðurnesja. Kórinn hélt skemmtikvöld laugardaginn 29. október og fékk þá Karlakór Keflavíkur í heimsókn. Þetta var frábær skemmtun sem hófst á því að kórfélagar ásamt mökum gæddu sér á dýrindis kvöldverði sem kvennakórskonur reiddu fram. Að því loknu voru ýmis skemmtiatriði þar sem kórarnir sungu nokkur lög hvor um sig og auðvitað sungu líka allir saman. Farið var með gamanmál, farið í leiki og að lokum skelltu gestir sér á dansgólfið og tóku sporið. Skemmtunin tókst í alla staði mjög vel en þetta var einnig fjáröflun fyrir Kvennakór Suðurnesja sem er að safna í ferðasjóð vegna fyrirhugaðs söngferðalags.

Kórkonur eru komnar í jólaskap enda löngu byrjaðar að æfa jólalögin fyrir aðventutónleika kórsins sem verða haldnir mánudaginn 5. desember og miðvikudaginn 7. desember.  Á tónleikunum verða fluttar margar jólaperlur, þar á meðal jólalag RÚV árið 2010, „Þeir hringdu hljómþungum klukkum„ eftir Suðurnesjatónskáldið Sigurð Sævarsson. Tónleikarnir verða nánar kynntir síðar.

Fastur liður í undirbúningi aðventunnar hjá Kvennakór Suðurnesja er laufabrauðsgerðin. Um næstu helgi ætla kórkonur að hittast ásamt fjölskyldum sínum og skera út og steikja 1500 laufabrauð, en þetta er ein stærsta fjáröflun kórsins. Laufabrauð kvennakórsins hefur verið mjög vinsælt og því um að gera fyrir þá sem hafa áhuga á að ná sér í laufabrauð að hafa samband við kórkonur. Hægt er að panta laufabrauð með tölvupósti.

Kóraborg býður til aðventutónleika í Reykholtskirkju fimmtudaginn 1. desember kl. 20.30.

Fram koma Freyjukórinn, Kór Menntaskóla Borgarfjarðar, Kór Saurbæjarprestakalls, Kór Borgarnesskirkju, Samkór Mýramanna, Gleðigjafar (kór eldri borgara), Kór Stafholtskirkju, Karlakórinn Söngbræður og Reykholtskórinn.

Kynnir verður Guðrún Jónsdóttir. Stjórnendur kóranna eru Zsuzsanna Budai, Jónína erna Arnardóttir, Steinunn Árnadóttir og Viðar Guðmundsson. Kórarnir syngja tvö lög hver og í lokin tvö lög saman.

Eftir tónleikana verður að vanda boðið upp á veitingar í safnaðarsal kirkjunnar.

Aðgangur er ókeypis og öllum heimill.