Kvennakórinn Embla flytur tónlist eftir Mahler, Rachmaninov, Grieg, Sigfús Einarsson og Atla Heimi Sveinsson á vortónleikum í Hömrum, Hofi á Akureyri fimmtudaginn 19. maí kl. 20.00 og í Fella- og Hólakirkju í Reykjavík sunnudaginn 29. maí kl. 16.00.
Á efnisskránni er undurfalleg og rómantísk tónlist sem enginn unnandi klassískrar tónlistar má missa af. Einsöngvarar úr röðum kórfélaga.
Píanóleikari er Aladár Rácz og Roar Kvam stjórnar.
Miðaverð: 2.500 kr.
Eldri borgarar: 2.000 kr.
Kvennakór Suðurnesja heldur vortónleika mánudaginn 16. maí í Bíósal Duushúsa í Reykjanesbæ og sunnudaginn 22. maí í Ytri-Njarðvíkurkirkju. Hefjast tónleikarnir kl. 20 bæði kvöldin.
Kórinn tók þátt í landsmóti kvennakóra sem haldið var á Selfossi 29. apríl – 1. maí þar sem rúmlega 600 konur úr 23 kórum tóku þátt. Dagskrá tónleikanna litast aðeins af landsmótinu þar sem nokkur laganna sem sungin voru á landsmótinu eru meðal þess sem er í tónleikaskránni en þar má nefna Flóaperlur sem eru lög eftir tónskáld úr Flóanum; Í dag skein sól eftir Pál Ísólfsson, Draumalandið eftir Sigfús Einarsson og Bahama eftir Ingólf Þórarinsson, auk hins fallega lags Angel eftir KK og ítalska lagsins Time to say goodbye eða Con te partirò sem söngvarinn Andrea Bocelli gerði vinsælt fyrir nokkrum árum. Á dagskránni verða einnig fleiri falleg íslensk og erlend lög sem og dægurlög í léttari kantinum, gospeltónlist, söngleikjatónlist og kirkjuleg verk. Það er því fjölbreytileikinn sem ræður för og eiga tónleikagestir von á góðri skemmtun.
Stjórnandi Kvennakórs Suðurnesja er söngkonan Dagný Þórunn Jónsdóttir og meðleikari á píanó er Geirþrúður Fanney Bogadóttir. Einnig leikur Eiríkur Rafn Stefánsson á trompet.
Miðaverð á tónleikana er kr. 1500, frítt fyrir 12 ára og yngri. Miðasala verður við innganginn.
Eins og áður sagði tók Kvennakór Suðurnesja þátt í glæsilegu landsmóti kvennakóra fyrir stuttu en það var Jórukórinn á Selfossi sem sá um framkvæmd mótsins að þessu sinni. Þetta var áttunda landsmót kvennakóra sem haldið hefur verið en þau eru haldin á þriggja ára fresti. Næsta landsmót verður haldið á Akureyri árið 2014 og mun kórinn væntanlega taka þátt þar. Þess má geta að Kvennakór Suðurnesja hélt landsmót í Reykjanesbæ árið 2002. Vorið 2012 ráðgerir kórinn að fara í tónleikaferð til Færeyja og er undirbúningur að hefjast fyrir þá ferð.
Vortónleikar Kvennakórs Garðabæjar verða haldnir þriðjudaginn 17. maí kl. 20 í Guðríðarkirkju, Grafarholti.
Þrátt fyrir að einungis séu þrjú ár frá því að Guðríðarkirkja var tekin í notkun þá er hún orðin eitt vinsælasta tónleikahús landsins enda rómuð fyrir fagran hljómburð.
Á tónleikunum býður Kvennakór Garðabæjar áheyrendum upp á fjölbreytta og sumarlega efnisskrá. Íslensk og bresk kórlög verða í öndvegi en auk þess syngja kórkonur í smærri sönghópum m.a. madrigala frá 16.öld. Stjórnandi kórsins er Ingibjörg Guðjónsdóttir en um hljóðfæraleik sjá þær systur Sólveig Anna Jónsdóttir á píanó og Herdís Anna Jónsdóttir á víólu. Miðaverð er 2000 kr. í forsölu. Forsala er hjá kórkonum og á netfanginu kvennakor@kvennakor.is. Miðaverð við innganginn er 2500 og 2000 kr. fyrir lífeyrisþega.Vortónleikar Kvennakórs Garðabæjar verða haldnir þriðjudaginn 17. maí kl. 20 í Guðríðarkirkju, Grafarholti.
Þrátt fyrir að einungis séu þrjú ár frá því að Guðríðarkirkja var tekin í notkun þá er hún orðin eitt vinsælasta tónleikahús landsins enda rómuð fyrir fagran hljómburð.
Á tónleikunum býður Kvennakór Garðabæjar áheyrendum upp á fjölbreytta og sumarlega efnisskrá. Íslensk og bresk kórlög verða í öndvegi en auk þess syngja kórkonur í smærri sönghópum m.a. madrigala frá 16. öld.
Stjórnandi kórsins er Ingibjörg Guðjónsdóttir en um hljóðfæraleik sjá þær systur Sólveig Anna Jónsdóttir á píanó og Herdís Anna Jónsdóttir á víólu. Miðaverð er 2000 kr. í forsölu. Forsala er hjá kórkonum og á netfangi kórsins. Miðaverð við innganginn er 2500 kr. og 2000 kr. fyrir lífeyrisþega.
Rokk og rómantík er yfirskrift tónleikanna hjá Kvennakór Kópavogs sem haldnir verða í Hörðuvallaskóla í Kópavogi þriðjudaginn 17. maí n.k. klukkan 20. Boðið verður upp á rómantísk lög í bland við þekkta rokkslagara. Miðaverð verður aðeins 1500 krónur og hægt verður að kaupa þá í forsölu með því að senda tölvupóst á miðasölu kórsins. Einnig verða seldir miðar við innganginn. Ókeypis aðgangur verður fyrir börn yngri en 12 ára. Stjórnandi kórsins er Julian M. Hewlett og undirleikari er Helgi Már Hannesson.
Kvennakór Kópavogs hefur haft nóg að gera á þessu níunda starfsári sínu. Í mars var farið í æfingabúðir austur fyrir fjall og dvöldu kórkonur þar heila helgi við söng og leik. Kórinn sendi fulltrúa sína á Landsmót kvennakóra á Selfossi, sem haldið var í byrjun maí, en þar komu saman yfir 600 konur víðsvegar að af landinu. Starfi Kvennakórs Kópavogs þetta árið lýkur svo í júní með söngferðalagi. Stefnan er tekin á Leeds á Englandi en ætlunin er að heimsækja vinakór sem heitir Goods in Parts.
Kvennakór Kópavogs stendur á tímamótum. Kórfélagar kveðja í vor, með söknuði, stjórnanda kórsins Julian Hewlett en hann hefur fylgt kórnum frá stofnun fyrst sem undirleikari en sem stjórnandi frá haustinu 2009. Við þökkum Julian fyrir vináttu og frábær störf með Kvennakór Kópavogs .
Framundan er tíunda starfsár Kvennakórs Kópavogs sem haldið verður upp á með veglegum hætti. Mikil gleði og bjartsýni ríkir í Kvennakór Kópavogs og horfa kórkonur kátar fram á næsta áratug.
